ಹಕ್ಕಿಗಳ ಸುಂದರ ಲೋಕ

ಹಕ್ಕಿಗಳು ನಮ್ಮ ನಿತ್ಯ ಜೀವನದಲ್ಲಿ ಅತಿಹೆಚ್ಚಾಗಿ ನೋಡುವ ವನ್ಯಜೀವಿಗಳು. ಇವು ಎಲ್ಲರನ್ನು ಅಯಸ್ಕಾಂತದಂತೆ ಆಕರ್ಷಿಸುತ್ತವೆ. ಮೊದಮೊದಲಿಗೆ ನಾನು ನಮ್ಮಲ್ಲಿ ಕೇವಲ ಕಾಗೆ, ಗುಬ್ಬಿ, ಗಿಳಿ, ಹದ್ದು, ಗೂಬೆ, ಮೈನಾ ಇವೇ ಮುಂತಾದ ಬೆರಳೆಣಿಕೆಯಷ್ಟು ಹಕ್ಕಿಗಳು ಮಾತ್ರ ನಮ್ಮಲ್ಲಿವೆ ಎಂದು ತಿಳಿದಿದ್ದೆ. ತೊಂಬತ್ತೈದರಲ್ಲಿ ನಾನು ಹಕ್ಕಿಗಳನ್ನು ನೋಡಲು ಮೈಸೂರಿಗೆಹೋಗುತ್ತಿದ್ದೆ. ಅಲ್ಲಿ ಮ್ಯಾನ್ ಸಂಸ್ಥೆಯ ಮನು ಹಾಗೂ ಅವರ ಗೆಳೆಯರೊಂದಿಗೆ ಬನ್ನೂರು, ಯಳಂದೂರು, ಕೊಳ್ಳೇಗಾಲ ಮುಂತಾದ ಊರುಗಳ ಸಾಲು ಸಾಲು ಕೆರೆಗಳ ಸಾವಿರಾರು ಸಂಖ್ಯೆಯ ವಿವಿಧ ವಲಸೆ ಹಕ್ಕಿಗಳನ್ನು ನೋಡಿ ರೋಮಾಂಚನವಾಗುತ್ತಿತ್ತು.
ಯಾವಾಗ ಹೊಸಪೇಟೆಯ ಸುತ್ತಲಿನ ಕೆರೆಗಳು, ತುಂಗಭದ್ರಾ ಅಣೆಕಟ್ಟಿನ ಹಿನ್ನಿರಿನ ಪ್ರದೇಶ, ದರೋಜಿ ಕರಡಿ ಧಾಮದಲ್ಲಿ ದುರ್ಬೀನು ಹಾಗೂ ಸಲೀಂ ಅಲಿಯವರು ಬರೆದ ಪಕ್ಷಿ ವೀಕ್ಷಕರ ಮಾರ್ಗದರ್ಶಿ ಪುಸ್ತಕ ಹಿಡಿದುಕೊಂಡು ಹುಚ್ಚನಂತೆ ತಿರುಗಾಡಿದಾಗ ಗೊತ್ತಾಗಿದ್ದು ನಮ್ಮ ಬಯಲು ಸೀಮೆ-ಉತ್ತರ ಕರ್ನಾಟಕದಲ್ಲೇ ಅತಿ ಹೆಚ್ಚಿನ ಖಗಸಿರಿ ಇರುವುದೆಂದು. ಮತ್ತೆ ಮೂರು ವರ್ಷಗಳ ಹಿಂದೆ ಬಯಲು ಸೀಮೆಯ ಹಕ್ಕಿಗಳನ್ನು ಕ್ಯಾಮೆರಾದಲ್ಲಿ ಸೆರೆಹಿಡಿಯಲು ಆರಂಭಿಸಿದಾಗಲಂತೂ ಹೊಸಜಗತ್ತೇ ನನ್ನ ಮುಂದೆ ತೆರೆದುಕೊಂಡಿತು. ನಮ್ಮ ಸುತ್ತಮುತ್ತಲು ಎಷ್ಟೊಂದು ವೈವಿದ್ಯಮಯ ಜೀವಜಗತ್ತು ಇದೆ ಗೊತ್ತೇ? ಅದನ್ನೆಲ್ಲಾ ನಿಮ್ಮೊಂದಿಗೆ ಹಂಚಿಕೊಳ್ಳುವೆ. ಬನ್ನಿ. ಸ್ವಾಗತ ನಿಮಗೆ ಖಗಲೋಕಕ್ಕೆ.

ನನ್ನ ಪರಿಚಯ.

ನಮಸ್ಕಾರ,

ನಾನು - ಸಮದ್ ಕೊಟ್ಟೂರು, ನಿಮ್ಮೊಂದಿಗೆ ನನ್ನ ಅನುಭವವನ್ನು ಹಂಚಿಕೊಳ್ಳಲು ಬಲು ಖುಷಿ ಆಗುತ್ತಿದೆ. ಹುಟ್ಟಿದ್ದು , ಬೆಳೆದಿದ್ದು, ಓದಿದ್ದು -ನನ್ನೂರು ಕೊಟ್ಟೂರಿನಲ್ಲೇ. ಎಂತಹ ಸುಂದರ ಪರಿಸರ, ಎಂಥಹ ವಾತಾವರಣ ಅಲ್ಲಿದೆ ಗೊತ್ತೇ. ಬಿ. ಎಸ್ಸಿ ಮುಗಿಸಿ ಅಲ್ಲಿಂದ ಓದಲು ಚಿತ್ರದುರ್ಗದಲ್ಲಿ ಒಂದು ವರ್ಷ ಕಳೆದು ನಂತರ ನೌಕರಿ. ಮತ್ತೆ ಆರು ತಿಂಗಳಿಗೋ ವರ್ಷಕ್ಕೊಮ್ಮೆಯೋ ಕೊಟ್ಟೂರಿಗೆ ಹೋಗುತ್ತೇನೆ.

ನಾನು ಪ್ರೌಢಶಾಲಾ ಶಿಕ್ಷಕನಾಗಿ ಸೊಂಡೂರು ತಾಲೂಕಿನ ಬಂಡ್ರಿ ಎಂಬ ಗ್ರಾಮದಲ್ಲಿ ಕೆಲಸಕ್ಕೆ ಸೇರಿದಾಗ ಅದೊಂದು ಅಧ್ಭುತ ಲೋಕಕ್ಕೆ ಬಂದಂತಾಗಿತ್ತು. ವಾರಕ್ಕೊಮ್ಮೆ ಮಕ್ಕಳ ಸೈನ್ಯವನ್ನು ಕಟ್ಟಿಕೊಂಡು ಅಲ್ಲಿನ ಸುಂದರ ಕಾಡಿನಲ್ಲಿ ಓಡಾಡಿ, ನೆಲ್ಲಿಕಾಯಿ, ಸೀತಾಫಲ ಮುಂತಾದ ಹಣ್ಣು ಹಂಪಲುಗಳನ್ನು ತರುತತಿದ್ದೆವು. ಅಪರೂಪದ ಸೈಕಾಸ್ ಎಂಬ ಮರಗಿಡಗಳು, ಗೌರಿ ಹೂವು ಎಂಬ ಅಪರೂಪದ ಔಷಧಿ ಗಿಡವನ್ನು ನೋಡಿ ರೋಮಾಂಚನವಾಗುತ್ತಿತ್ತು. ಈ ಬಂಡ್ರಿ ಗ್ರಾಮದಲ್ಲೇ ನನಗೆ ಪರಿಸರ, ಪ್ರಾಣಿ-ಪಕ್ಷಿ ಕುರಿತು ಪ್ರೀತಿ ಕಾಳಜಿ ಬೆಳೆದಿದ್ದು.

ಈಗ ಒಂದೂವರೆ ದಶಕದಿಂದ ಸಾಕಷ್ಟು ಕಲಿತಿದ್ದೇನೆ. ಇನ್ನೂ ಕಲಿಯಬೇಕಾದುದು ಬಹಳಷ್ಟು ಇದೆ. ಇಲ್ಲಿಯವರೆಗೆ ನಾನುಅನುಭವಿಸಿದ ಸುಂದರ ಪರಿಸರ, ನೋಡಿದ ಸುಂದರ ಹಕ್ಕಿಗಳು, ಮಾಡಿದ ಕೆಲವು ಹೆಮ್ಮೆಯಿಂದ ಹೇಳಿಕೊಳ್ಳುವಂಥಹ ಘಟನೆಗಳುನಿಮ್ಮೊಂದಿಗೆ ಹಂಚಿಕೊಳ್ಳುತ್ತಿದ್ದೇನೆ.
ನಮಸ್ಕಾರ.